S7 Airlines aviakompaniyasi Volgograddan Farg‘onaga parvozni yo‘lga qo‘ydi

S7 Airlines aviakompaniyasi Volgograddan Farg‘onaga parvozni yo‘lga qo‘ydi

Rossiyaning "S7 Airlines" (Sibir) aviakompaniyasi "Volgograd – Farg‘ona – Volgograd" yo‘nalishi bo‘yicha parvozni yo‘lga qo‘ydi. Bu haqda Uzbekistan Airports matbuot xizmati xabar berdi.

Birinchi parvoz 7 dekabr kuni amalga oshirildi: S7 samolyoti Farg‘ona xalqaro aeroportiga qo‘ndi, an’anaga ko‘ra, u suv archasi bilan tantanali ravishda kutib olindi.

"Volgograd – Farg‘ona – Volgograd" yo‘nalishi bo‘yicha reyslar seshanba kunlari 174 o‘rinli qulay Airbus 320 samolyotida amalga oshiriladi. Volgograd xalqaro aeroporti matbuot xizmati xabariga ko‘ra, aviatashuvchining samolyotlari soat 06:25 da uchib, 15:10 da qaytib keladi. Bir yo'nalishda sayohat vaqti 3 soat 35 minutni tashkil qiladi.

Parvoz dasturi kuz-qish mavsumining oxirigacha - 2022-yilning 22-martigacha yakunlanadi.

Eslatib o‘tamiz, avvalroq O‘zbekiston Transport vazirligi matbuot xizmati Rossiya aviakompaniyalarining Respublikaga muntazam qatnovlarining qishki jadvali tasdiqlangani haqida xabar bergan edi. Jadvalga koʻra, S7 Airlines aviakompaniyasi Oʻzbekistonga Rossiyaning uchta shahri – Moskva, Novosibirsk va Irkutskdan parvozlarni amalga oshiradi. Aviakompaniya Nijniy Novgoroddan Urganchga va teskari muntazam reyslarni ham yo‘lga qo‘ydi.

* * *

Eslatib o‘tamiz, O‘zbekistonga kirish uchun koronavirusga PCR testi salbiy natija bergan sertifikat taqdim etish kerak. Test O‘zbekistonga kirishdan 72 soat oldin o‘tkazilishi kerak.